Kour Fondasion Lir ek Ekrir Kreol Morisien

Enn dat inportan zordi pou mwa, sa Samedi 11 Me 2024 la. Mo’nn koumans swiv kour fondasion dan “Lir ek Ekrir Kreol Morisien” dan Liniversite Moris.

Kour-la pou pandan enn mwa ek, alafin, mo espere mo pou konn lir ek ekrir mo lang maternel mari bien. Premie kour zordi ti par Prof. Arnaud Carpooran lor bann konsep fondamantal lor definision Kreol, kiete enn lang ek kouma Kreol Repiblik Moris ti evolie ek pou evolie dan letan. Zedi, nou pou ena nou premie kour lor lir ek ekrir ek mo panse ki mo pou kapav debrouye parski, depi 2-3 an, Christina inn met boukou laksan lor langaz kreol dan nou lakaz. Ler mo pou fini avek sa premie kour-la, mo pou ena enn deziem kour lor opsion administrasion, pou ki mo konn bien ekrir bann dokiman administratif ek bann rapor.

Mo pou swiv sa kour-la avek plin profeser ki bien konpetan: Arnaud Carpooran, Yani Maury, Gaëlle Bass, Yannick Bosquet, Beatrice Antonio-Françoise, Shrita Hassamal, Tenusha Jundoosing, Melanie Pérès ek Christina biensir.